ಬೆಳದಿಂಗಳ ಬೆಳಕಿನಲಿ
ಕೈ ತುತ್ತಿನ ಅಮೃತದಲಿ
ಕಣ್ಣೀರಿನ ಕಷ್ಟಗಳ ಕರಗಿಸಿ
ಹಮ್ಮೀರ ಬದುಕನು ಕಲಿಸಿ
ಬೆಳಕಿನ ಹಾಲ್ತೊರೆ ನನ್ನ ಸಾಕವ್ವ

ಅಮಲಿನ ಮಧ್ಯ ಮಾರಾಟ ಕಾಯಕದಲಿ
ಅಮಲಿನ ಜನಗಳಿಗೆ ವಾಸ್ತವ ಬದುಕಿನಲಿ
ಬೆಂಗಾಡಿನ ದುರಂತದ ಚಿತ್ರಣ ಕಂಡರಿಸಿ
ಬೈಗುಳದ ಬೋಗುಣಿಯಲ್ಲೇ ಪಯಣಿಸಿ
ಬದುಕುವ ಬತ್ತಿ ನನ್ನ ಸಾಕವ್ವ

ಮಡಿಲೊಳಗೆ ಮಕ್ಕಳಿಲ್ಲವೆಂಬ ಜೀವನ ಕಟುಸತ್ಯ
ಮಡಿಲೊಳಗೆ ಮಕ್ಕಳಿಲ್ಲವೆಂಬುದನು ಅಳಿಸಿದಾಕೆ ನಿತ್ಯ
ಜಗದ ಜನರ ಬಿರುನುಡಿಗಳಿಗೆ ಬಾಗದಾಕೆ
ಜಗದ ಜನರೊಳಗೆ ತ್ಯಾಗವನು ತಣ್ಣಗೆ ಕಲಿಸಿದಾಕೆ
ಅರಿವಿನ ಹಣತೆ ನನ್ನ ಸಾಕವ್ವ

ತಾನೊಬ್ಬಳೇ ಹಾಯಾಗಿ ಅರಮನೆ ಕಟ್ಟಿಕೊಳ್ಳಬಹುದಾಗಿತ್ತು.
ತಾನೊಬ್ಬಳಿರದೇ ತಬ್ಬಲಿಗಳನು ತಬ್ಬಿಕೊಂಡು
ನೊಂದವರ ಬಾಳಿಗೆ ಕರುಣೆಯ ಕಡಲಾಗಿ
ತಾಯ್ತತನಕೆ ತ್ಯಾಗದ ಪ್ರತೀಕವಾಗಿ
ಬಾಳ ಬದುಕಿಗೆ ಬಂಗಾರದ ರೇಖೆಯಾಗಿ
ಬಾಡದ ಬತ್ತದ ಅನಂತಾನಂತ ವ್ಯೋಮಾತೀತದ ಉಸಿರಾಗಿ
ಪಂಚಭೂತವಾಗಿದ್ದಾಳೆ ನನ್ನ ಸಾಕವ್ವ

ಡಾ. ನಾಹೀರಾ
ಕುಷ್ಟಗಿ