ಅವ್ವ
ನೀ ಎಂದೂ ತೀರದ
ಪ್ರೇಮದ ಖಣಿ
ನಿನ್ನೊಡಲು
ಥೇಟ್ ಕಡಲು

ಅವ್ವ
ನೀ ಹಚ್ಷಿದ ಹಣತೆ
ನಮ್ಮ ಬಾಳ ಹಾದಿಯ
ಕತ್ತಲು ನುಂಗಿದ್ದು

ಅವ್ವ
ನೀನು ಸಾಲು ಸಾಲು
ಸೋಲುಗಳುಂಡರೂ
ನಮ್ಮ ಬಾಳಿಗೆ
ಸಾಲುದೀಪವಾದೆ
ನೀನು ಬದುಕಿದ ರೀತಿ ನೋಡಿದರೆ
ಅಕ್ಷರಗಳಿಗಿಲ್ಲಿ
ಸೋಲೇ ಸೋಲು

ಅವ್ವ
ನೀ ಕಂಡ ಕಪ್ಪು ಬಿಳುಪು
ಕನಸುಗಳಲ್ಲಿ
ಹಲವು ಬಣ್ಣಗಳಿಗೆ ಜೀವ ತುಂಬಿದೆ
ಖುದ್ದು ಗಂಧದ ಕೊರಡಂತೆ
ತೇದು ಗೇದು
ಕಲ್ಲು ಮನಗಳಲಿ ನಗುವ
ಹೂವರಳಿಸಿ
ಮನೆಯಂಗಳದಿ
ಸಾಲುದೀಪವಾಗಿ ಬೆಳಗುತಿರುವೆ

ನಮ್ಮವ್ವನ ಬಾಳಲ್ಲಿ
ಮತ್ತೆ ಮತ್ತೆ ಪಣವೊಡ್ಡಿ
ಕಸುವು ಕಸಿಯಲು ಹವಣಿಸಿದಾಗ
ಈ ಬದುಕು ಮಣಿದೇ ಬಿಟ್ಟಿತು
ಮಂಡಿಯೂರಿದ ನಮ್ಮವ್ವನ
ದೈನ್ಯತೆಗೆ

ನಮಗಾಗಿ ಏನನ್ನೂ
ಕೂಡಿಡದ ಅವ್ವ
ಅಳಿಯದ ಕಳಿಯದ
ಅಕ್ಷರ ಕಲಿಸಿ
ಅಕ್ಷಯವಾಗೆಂದು ಹರಸಿದಳು
ಕರುಳಿಗೆ ಕರುಣೆಯ
ಬೆಸುಗೆಯನು ಬೆಸೆದಿರುವಳು

ಅವ್ವ,
ನಾನೆಷ್ಟು ಬರೆವೆನೊ
ನೀನು ದುಪ್ಪಟ್ಟು
ಬದುಕಬೇಕೆಂದು
ನನ್ನ ಶುಭ ಹಾರೈಕೆಯು ಇಂದು

ಡಾ.ದಾವಲಸಾಬ ನರಗುಂದ