ಸೂರ್ಯನಿಗಿಂತ ಮೊದಲೇ ಎದ್ದೇಳುವಳು
ಚಂದಿರ ಬಂದರೂ ಮಲಗದವಳು
ರಂಗೋಲಿ ಹಾಕುತ್ತಾ ಸುಪ್ರಭಾತ ಹಾಡುತ್ತಾ ಎಬ್ಬಿಸುವಳು
ನಾ ಎದ್ದಾಗ ನಗು ನಗುತ್ತ ನನ್ನಪ್ಪ ಎಂದವಳು ನನ್ನವ್ವ

ರುಚಿ ಶುಚಿ ಮಾಡಿ ಹಾಕಿದವಳು
ತನಗೆ ಉಳಿಯದಿದ್ದಾಗ ಹಸಿವಿಲ್ಲ ಎಂದವಳು
ಹಣೆಯಲ್ಲಿ ಸೂರ್ಯನಂತೆ ಕುಂಕುಮ ದರಿಸಿದವಳು
ಕೆನ್ನೆಗೆ ಅರಿಶಿನ ಹಚ್ಚಿದವಳು ನನ್ನವ್ವ

ಸ್ವಲ್ಪ ಗಾಯವಾದಾಗ ವೈದ್ಯಳಾದಳು
ಅಂಜಿದಾಗ ದೇವತೆಯಾದಳು
ಕುಟುಂಬದ ಭವಿಷ್ಯಕ್ಕೆ ಇಂಜಿನಿಯರ್ ಆದಳು
ತನಗೆಂದು ಏನು ಮಾಡಿಕೊಳ್ಳದವಳು ನನ್ನವ್ವ

ನಗುಮುಖದವಳು
ಜೀವನದ ಸ್ಪೂರ್ತಿಯವಳು
ಎಲ್ಲದಕ್ಕೂ ಮೂಲ ಪ್ರಯತ್ನ ಎಂದವಳು
ದೇವರಿದ್ದಾನೆ ಮುನ್ನಡಿ ಎಂದವಳು ನನ್ನವ್ವ

ಎಷ್ಟೋ ದೇವರಿಗೆ ಉಪವಾಸ ಮಾಡಿದವಳು
ಎಷ್ಟೋ ಕಷ್ಟ ಪಟ್ಟವಳು
ಆದರೂ ನಾನು ಚೆನ್ನಾಗಿದ್ದೇನೆ
ನನಗೇನಾಗಿದೆ ಅಂದವಳು ನನ್ನವ್ವ

ವಿಶ್ವನಾಥ ಗು ಕುಲಕರ್ಣಿ