ಅವ್ವ ಎಂದರೇ ಹಾಗೆಯೇ
ತನ್ನೊಡಲು ಹಸಿದು ಕಂಗೆಟ್ಟರೂ
ಅನ್ನದ ಬಟ್ಟಲು ಹಿಡಿದು ಚಂದಮಾಮನನ್ನು ತೋರಿಸಿದವಳು

ತನ್ನ ಪ್ರತಿ ಉಸಿರು ಕರುಳಿನ ಕುಡಿಗೆ ಮೀಸಲು ಇಟ್ಟವಳು
ಸೀರೆಯ ಸೆರಗು ಗಾಳಿ ಬೀಸುವ ಚಾಮರ
ಒಮ್ಮೊಮ್ಮೆ ಅದುವೇ ಹಾಸಿಗೆ ಹೊದಿಕೆಯ ಚಾದರ

ಹರಿದ ಸೀರೆಗೆ ನೂರೆಂಟು ತೇಪೆ
ಅಲ್ಲಲ್ಲಿ ಹೊಲಿಗೆ ಹಾಕಿದ ಕಸೂತಿ
ಅದಿನ್ನೂ ಅಮ್ಮನಿಗೆ ಸೀರೆ ಹೊಸತು
ಬೇಕು ಎನ್ನುವ ಪದದ ಅರ್ಥವೇ ನಿಗೂಢ

ಅವ್ವ ಎಂದರೆ ಹಾಗೆಯೇ
ಮಮತೆ ವಾತ್ಸಲ್ಯ ಗಳ ಬರಿದಾಗದ ಖನಿ
ಅಪ್ಪನ ಹೆಗಲಿಗೆ ಹೆಗಲಾಗಿ ದುಡಿವ ಮಾನಿನಿ

ಅವ್ವ ಎಂದರೆ ಹಾಗೆಯೇ
ಇದ್ದಾಗ ಇದ್ದಷ್ಟು ಉಂಡು ಇಲ್ಲದಾಗ
ಇಲ್ಲವೆನ್ನದೆ ತಣ್ಣೀರು ಕುಡಿದು ಮಲಗಿದಾಕೆ

ರಚ್ಚೆ ಹಿಡಿದು ರಂಪಾಟ ಮಾಡಿದಾಗಲೂ
ಸಹನೆಯ ಎಲ್ಲೆ ಮೀರದಾಕೆ

ಅವ್ವ ಎಂದರೆ ಹಾಗೆಯೇ
ಮರುಭೂಮಿಯಲ್ಲಿ ಜಿನುಗುವ ಬತ್ತದ ತೊರೆ
ಬರಿದಾಗದ ಪ್ರೀತಿಯ ಅಕ್ಷಯ ಪಾತ್ರೆ

ಕೊಟ್ರೇಶ ಜವಳಿ
ಹಿರೇವಡ್ಡಟ್ಟಿ