ಈಗಾಗಲೇ

ಒಳ-ಹೊರಗಿನ

ಗಾಳಿಯನು ಗುತ್ತಿಗೆ ಪಡೆದಿದ್ದಾರೆ,

ನಮ್ಮ ಗುಡಿಸಲಿನ-

ಹಣತೆಯ ಬೆಳಕು

ಅವರು……

ನುಂಗುವದೆಷ್ಟೊತ್ತು….?

ಯಾರು…ಯಾರವರು..?

ಚುಕ್ಕಿ ಚಂದ್ರಮರ

ನೆರಳ ಕೊರಳಿಗೆ-

ನೋಟಿಸ್ ಕೊಟ್ಟಿದ್ದಾರಂತೆ

ಹೊಳೆ,ಹಳ್ಳ,ಕೊಳಗಳ

ಹಕ್ಕಿಪಿಕ್ಕಿ ಜೀವ ಸಂಕುಲಗಳ

ಝರಾಕ್ಷ್ ಪ್ರತಿ ತೆಗೆಸಿ,

ಹುಟ್ಟು-ಸಾವಿನ ಬೆಳೆಗಾರರೇ ಅವರಾಗಿದ್ದಾರಂತೆ

ಯಾರು…ಯಾರವರು..?

ಗುಡುಗು,ಮಿಂಚಿಗೆ

ಮುತ್ತಿಗೆ ಹಾಕಿ,

ಸಂಚುಗಾರರಾಗಿದ್ದಾರಂತೆ

ಭ್ರಮೆಗೊಳಗಾದ ಮೋಡವು,

ಅರುಣನೆದೆಯ ಕದ ತಟ್ಟಿ-

ತನ್ನಾತ್ಮವನು ತೆರೆದಿಟ್ಟು,

ತನಗೆ ತಾನೆ ತಲೆ ಬೋಳಿಸಿಕೊಂಡಿದೆಯಂತೆ

ನಿದ್ರೆಯಿರದ ಸೂರ್ಯ ನಿಸ್ತೇಜವಾಗಿದ್ದಾನಂತೆ

ಯಾರು…ಯಾರವರು..?

ಕಡಲ ಆಳ,ಅಗಲ,

ವಿಸ್ತಾರವನು ಲೆಕ್ಕ-

ತೆಗೆದುಕೊಂಡಿದ್ದರಂತೆ

ಹಿಮ ಗಿರಿ ಶಿಖರಗಳ ಆಯುವನು-

ನಿಷ್ಕ್ರಿಯಗೊಳಿಸಿ,

ಮೂರ್ತ ಅಮೂರ್ತದ

ಹಂಗನ್ನು ಶೂನ್ಯಗೊಳಿಸಿದ್ದಾರಂತೆ.,

ಕಾಡು,ಗುಡ್ಡ,ಬೆಟ್ಟ ಗವಾರಗಳ ಸಣ್ಣ ಉಸಿರಾಟಕ್ಕೂ ತೆರಿಗೆ ವಿಧಿಸುತ್ತಾರಂತೆ

ಯಾರು…ಯಾರವರು…?

ಸತ್ಯದ ತಲೆಗಳ

ಪ್ರಶ್ನಿಸುವ ಮನಗಳ

ಸಭ್ಯಸ್ಥರ ದಿನಗಳ ಬಾಳನು

ಡಿಲಿಟ್ ಮಾಡುತ್ತಾ….

ಈ ಮಣ್ಣಿನ ಕಣ್ಣೀರು ಹರಿದಂತೆಲ್ಲಾ..‌.ನಿರಂತರ

ನೆಕ್ಕುತ್ತಿರುತ್ತಾರಂತೆ

 ಆಗ…….ನಮ್ಮೆಲ್ಲರ ಕಣ್ಣು

ನೆಲ ಬರೆಯುತ್ತವೆ.

ಆಪತ್ಕಾಲದಲಿ

ಸೂಲಗಿತ್ತಿಯು ಸ್ಕಲಿಸಿದ ಹಾಗೆ ಮೆತ್ತಗಿರುತ್ತೇವೆ.

ಯಾರು….ಯಾರವರು..?

ಬಂಡವಾಳಶಾಯಿಗಳು

ರಾಜಕಾರಣಿಗಳು

ಕುಂಟಲಗಿತ್ತೆಯರು

ಶರಣಪ್ಪ ತಳ್ಳಿ ಕುಪ್ಪಿಗುಡ್ಡ