ಓ ಮಳೆಯೇ ನೀ ನಿಲ್ಲದಿರು

ಓ ಮಳೆಯೇ ನೀ ನಿಲ್ಲದಿರು
ನಿನ್ನ ಹನಿಗಳ ರಾಶಿಯ
ಬರಸೆಳೆದು ಮುತ್ತನೀಯುವ
ಮಹಾದಾಸೆಯು ಬುವಿಗೆ

ಓ ಮಳೆಯೇ ನೀ ನಿಲ್ಲದಿರು
ನಿನ್ನ ಆಲಾಪದ ಗುಂಗಿನಲಿ
ನಿನ್ನೊಡನೆ ಮೈ ಮರೆತು
ನರ್ತಿಸುವ ಮಹಾದಾಸೆ
ಮಯೂರಿಗೆ

ಓ ಮಳೆಯೇ ನೀ ನಿಲ್ಲದಿರು
ನೀ ಬರುವ ವೇಳೆಯಲಿ
ಮಣ್ಣಿನ ಸುಗಂಧವನ್ನು
ಹೀರುತ ತನ್ಮಯಳಾಗುವ
ಮಹಾದಾಸೆ ನನಗೆ

ಓ ಮಳೆಯೇ ನೀ ನಿಲ್ಲದಿರು
ಸುಯ್ಯನೆ ಸುರಿಯುವ ನಿನ್ನ
ಜಲ ಧಾರೆಯಲಿ
ಕಾಗದ ದೋಣಿಯ ತೇಲಿ
ಬಿಡುವ ಮಹಾದಾಸೆ ಚಿಣ್ಣರಿಗೆ

ಓ ಮಳೆಯೇ ನೀ ನಿಲ್ಲದಿರು
ಮನದ ಗೊಂದಲ ದೂರವಿರಿಸಿ
ತುಸು ಹೊತ್ತು ಮೈ ಚೆಲ್ಲಿ
ಕುಣಿದು ಕುಪ್ಪಳಿಸುವ
ಮಹಾದಾಸೆ ಜಲಚರಗಳಿಗೆ

ಓ ಮಳೆಯೇ ನೀ ನಿಲ್ಲದಿರು
ಧರೆಯ ಒಡಲನ್ನು ಹದಗೊಳಿಸಿ
ಉತ್ತಿ ಬಿತ್ತಿ ಸಂಭ್ರಮ ಪಡುವ
ಮಹಾದಾಸೆಯು ನಮ್ಮ
ನೇಗಿಲ ಯೋಗಿಗೆ

ಓ ಮಳೆಯೇ ನೀ ನಿಲ್ಲದಿರು
ನಿನಗೆ ನಾ ಸೋತು
ನನ್ನ ಪದಗಳಿಗೆ ಜೀವವ
ತುಂಬಿ ಕವಿತೆಯೊಂದನು
ಕಟ್ಟುವ ಮಹಾದಾಸೆ ನನಗೆ

ರೇಣುಕಾ ಶಿವಕುಮಾರ

ಪ್ರಕಟಣೆಗಾಗಿ ಸಂಪರ್ಕಿಸಿ: