ಬಸವ ಮಹಿಮೆ

ಬಸವನೆಂದರೆ ಮನದ ವ್ಯಸನ ಕಳೆದ ಮಹಿಮ
ಹಸನಾದ ಬದುಕಿನ ಮಾರ್ಗ ತೋರಿದ ಶರಣ
ಕಸದಂತೆ ಕೀಳಾದವರ ಏಳ್ಗೆ ಮಾಡಿದ ದಾರ್ಶನಿಕ
ಈಶ ಕಾಯಕ ಯೋಗಿಗೆ ಶರಣು ಶರಣು

ಅಜ್ಞಾನ-ಮೂಢನಂಬಿಕೆಗಳನು ಹೊಡೆದೋಡಿಸಿದಾತ
ಸುಜ್ಞಾನದ ಪಥವನ್ನು ಜನರ ಮನಕೆ ನೀಡಿದಾತ
ಮೇಲು-ಕೀಳೆಂಬುದನು ಬೇರು ಸಮೇತ ಕಿತ್ತಿದಾತ
ಕಲ್ಯಾಣದಲಿ ಕ್ರಾಂತಿಯ ಕಹಳೆ ಊದಿದಾತ

ವಚನಗಳ ಮೂಲಕ ಸಮಾಜದ ಕೊಳೆ ತೊಳೆದಾತ
ಅಚಲ ಕಾಯಕ-ಭಕ್ತಿಯ ಮಾರ್ಗ ತೋರಿದಾತ
ಮಾಡಿಯೂ ಮಾಡದಂತಿರುವ ಸರಳತೆಯ ಹೇಳಿದಾತ
ನುಡಿಯೊಳಗಾಗಿ ನಡೆಯುವಂತೆ ತಿಳಿಸಿದಾತ

ಅಂತರಂಗ-ಬಹಿರಂಗ ಶುದ್ಧಿಯ ಸೂತ್ರ ಅರುಹಿದಾತ
ಮಂತ್ರ-ತಂತ್ರಗಳ ಕುತಂತ್ರವ ಬಯಲಿಗೆಳೆದಾತ
ಮಾಡುವ ಕಾಯಕದಲೆ ಕೈಲಾಸವನ್ನು ತೋರಿದಾತ
ಕೂಡಲಸಂಗಮ ದೇವನಲಿ ಒಂದಾಗಿ ನಡೆದಾತ

ಎಮ್. ಎಚ್. ಹಾಲ್ಯಾಳ (ಕೋಳೂರ)
ಮುದ್ದೇಬಿಹಾಳ.
ಜಿ|ವಿಜಯಪುರ.

ಪ್ರಕಟಣೆಗಾಗಿ ಸಂಪರ್ಕಿಸಿ: