ಅಂಧಕಾರವ ಓಡಿಸಿ ಜ್ಞಾನ ದೀವಿಗೆ ಹೊತ್ತಿಸಿದವರು
ತಪ್ಪಿದಾಗ ಮಾತಲ್ಲೇ ಶಿಕ್ಷಿಸಿ ಕ್ಷಮಿಸಿದವರು
ಅಕ್ಕರೆಯಿಂದ ಅಕ್ಷರವ ಕಲಿಸಿದವರು
ಶ್ರೇಷ್ಠ ವ್ಯಕ್ತಿಗಳ ವಿಚಾರಧಾರೆ ತಲೆಗೆ ತುಂಬಿಸಿದವರು

ಬೋಧನೆಯ ಮೂಲಕ ಸಾಧನೆಯ ಹಾದಿ ತೋರಿದವರು
ನಮ್ಮ ಶ್ರೇಯೋಭಿವೃದ್ಧಿಯ ಹರಿಕಾರರಾದವರು
ಪೋಷಕರಂತೆ ಪ್ರೀತಿ ತೋರಿದವರು ಸ್ನೇಹಿತರಂತೆ
ಸ್ನೇಹಭಾವದಲ್ಲಿ ಜೊತೆಗೂಡಿದವರು

ನುಡಿಯೊಂದಿಗೆ ಉತ್ತಮ ಮಾನವೀಯ ಮೌಲ್ಯ ಬೋಧಿಸಿದವರು
ಪ್ರತಿ ಸೋಲಲ್ಲೂ ಗೆಲುವಿನ ಭರವಸೆ ಮೂಡಿಸಿದವರು
ತಮ್ಮ ಕನಸನ್ನು ವಿದ್ಯಾರ್ಥಿಗಳ ಮೂಲಕ ನನಸಾಗಿಸಲು ಪ್ರಯತ್ನಿಸಿದವರು
ಎಂದೂ ಬತ್ತದ ಆತ್ಮವಿಶ್ವಾಸಕ್ಕೆ ನೀರೆರದು ಪೋಷಿಸಿದವರು

ತಾವು ತಿಳಿದ ವಿಷಯವ ಹಂಚುವ ತವಕದಲ್ಲಿರುವವರು
ಸ್ವಂತ ಮಕ್ಕಳಂತೆ ಸಾಕಿ ಸಲಹುತ್ತ ಅಕ್ಷರ ಧಾರೆಯೆರೆದವರು
ಸನ್ನಡತೆ ಸಚ್ಚಾರಿತ್ರ್ಯ ಬೆಳೆಸಿದವರು
ಪುಸ್ತಕ ಪ್ರೇಮಿಯಾಗಲು ಪ್ರೇರೇಪಿಸಿದವರು

ಬರವಣಿಗೆಗೆ ಮಾರ್ಗದರ್ಶಕರಾದವರು
ತಿದ್ದಿ ಬುದ್ದಿ ಹೇಳಿ ಜೀವನ ರೂಪಿಸಿದವರು
ಸದಾ ಜ್ಞಾನದ ಹಸಿವನ್ನು ತಣಿಸಿ ಹಸಿರಾಗಿಸಿದವರು
ಕುಗ್ಗಿದಾಗ ಧೈರ್ಯ ತುಂಬಿ ಹುರಿದುಂಬಿಸಿ ಮೇಲೆತ್ತಿದವರು

ಜ್ಞಾನದ ಬೆಳಕ ನೀಡಿ ಬಾಳ ಬೆಳಗಿದವರು
ಒಟ್ಟಾರೆ ಜೀವನದ ಪ್ರತಿ ಕ್ಷಣದಲ್ಲೂ ಉಸಿರಾದವರು
ಇವರ ಬಗ್ಗೆ ವರ್ಣಿಸಲು ಬೇರೆ ಪದ ಬೇಕೆ ?
ಗುರು ಎಂದರೆ ಅಷ್ಟೇ ಸಾಕೆ?

ಗೌರವಾನ್ವಿತ ಶಿಕ್ಷಕರಿಗೆ ಅರ್ಪಣೆ
ಶುಭಾಶಯಗಳೊಂದಿಗೆ

ಉಷಾ ಪ್ರಶಾಂತ್
ಸಿದ್ದಾಪುರ

ಪ್ರಕಟಣೆಗಾಗಿ ಸಂಪರ್ಕಿಸಿ:

ಇದು ವೆಬ್ ಸೈಟ್ ಮತ್ತು ಯ್ಯಾಪ. ಇದರಲ್ಲಿ ಪ್ರಕಟಣೆಗಾಗಿ ನಿಮ್ಮ ಕವನ, ಕಥೆ, ಪ್ರಬಂಧ, ಲೇಖನ ಹಾಗೂ ಪುಸ್ತಕ ವಿಮರ್ಶೆಗಳನ್ನು ಕಳುಹಿಸಬಹುದು.
WhatsApp No. 8310000414 ಗೆ ಕಳುಹಿಸಬಹುದು.

ಇದನ್ನೂ ಓದಿ: ಸವಿತಾ ಮುದ್ಗಲ್ ಅವರ ನೆರಳಿಗಂಟಿದ ಭಾವ ಕವನ ಸಂಕಲನ ಕೃತಿಯ ಪರಿಚಯ
ಈಗಲೇ ವಾಟ್ಸಾಪ್ ಚಾನೆಲ್ ಫಾಲೋ ಮಾಡಿ: ಕ್ಲಿಕ್ ಮಾಡಿ