ಸಂಭ್ರಮದ ಯುಗಾದಿ

ಕಂಪನು ಬೀರಿವೆ ಸುಮಗಳು
ಹಸಿರನು ಹೊದ್ದಿವೆ ಲತೆಗಳು
ತಂದವು ಉಲ್ಲಾಸ ನಮಗೀಗ
ಹರಡುತ ಸಿರಿಯನು ಯುಗಕೀಗ

ಯುಗ ಯುಗಗಳು ಸಾಗಿದೆ
ನಾವೀನ್ಯತೆಯ ನವಯುಗ ಬಂದಿದೆ
ಚಮತ್ಕಾರದ ಚೈತ್ರಕೆ ಕೋರುತ ಸ್ವಾಗತ
ಮೆಚ್ಚಿನ ಬೇವು – ಬೆಲ್ಲವ ಮೆಲ್ಲುತ

ಬ್ರಹ್ಮನ ಸೃಷ್ಟಿಯ ದಿನವಿದು
ಖಗ- ಮೃಗಗಳ ಬದುಕಿಗೆ ತಾಣವಿದು
ನಿಶೆಯು ಸರಿದು ಬೆಳಕಿನ ಕೌತುಕವಿಲ್ಲಿ
ನವ್ಯಕೆ ವಸಂತ ಋತುವಿನ ಆಗಮನವಿಲ್ಲಿ

ಪ್ರಕೃತಿ ಶೋಭಿತ ಆಭರಣ
ಸುಕೃತಿ ತೋರುತ ಸಾಗೋಣ
ಕಿಚ್ಚನು ಸುರಿಯುತ ಮದ – ಮತ್ಸರಕೆ
ಕಾಂತಿಯ ಬೀರುತ ನವ ಸಂವತ್ಸರಕೆ

ಶೋಭೆಯ ತರಲಿ ಶೋಭಕೃತ್
ಶುಭವನು ಸಾರಲಿ ಸಕಲಕೂ
ಒಲವು – ಗೆಲುವು ನಿತ್ಯವೂ ಬೆರೆಯಲಿ
ಸಿಹಿ – ಸವಿಯಿರಲಿ ಬದುಕಿನ ತೊರೆಯಲಿ

ಗಾಯತ್ರಿ ನಾರಾಯಣ ಅಡಿಗ
ಶಿಕ್ಷಕರು, ಸ. ಹಿ. ಪ್ರಾ ಶಾಲೆ ಕರ್ಕುಂಜೆ

ಪ್ರಕಟಣೆಗಾಗಿ ಸಂಪರ್ಕಿಸಿ: