ಪುಟ್ಟಿಯ ಆಕಾಶಬುಟ್ಟಿ

ಬಣ್ಣ ಬಣ್ಣದ ಆಕಾಶಬುಟ್ಟಿ
ಕೊಳ್ಳಲಾಗದ ನಮ್ಮ ಪುಟ್ಟಿ
ಅವ್ವನೊಂದಿಗೆ ಬೆರಣಿ ತಟ್ಟಿ
ತುಂಬಿದಳು ಬುಟ್ಟಿ ಬುಟ್ಟಿ

ಬಸವನ ಹೂಡಿ ಬಂಡಿಯ ಕಟ್ಟಿ
ಜೋಡಿಸಿದಳು ಬೆರಣಿ ಬುಟ್ಟಿ
ಕಟ್ಟಿಕೊಂಡು ಬುತ್ತಿಯಲಿ ರೊಟ್ಟಿ
ಹೊರಟಳು ಸುಕುಮಾರಿ ದಿಟ್ಟಿ

ಬುಟ್ಟಿಯನಿಟ್ಟಳು ಸಾಲುಗಟ್ಟಿ
ಜನರ ಕೂಗುವ ಧ್ವನಿಯದು ಗಟ್ಟಿ
ಒಲಿಸಿಕೊಂಡಳು ಮನಸು ತಟ್ಟಿ
ಬೆರಣಿಯ ಮಾರಿದಳು ಬಲು ತುಟ್ಟಿ

ಮಾರಿದ ಕಾಸನು ಗಂಟು ಕಟ್ಟಿ
ಕುಣಿಯುತಾ ಹೊರಟಳು ಪುಟ್ಟಿ
ಕೊನೆಗೂ ಕೊಂಡಳು ಆಕಾಶಬುಟ್ಟಿ
ಬಡತನಕ್ಕೆ ಅಂಜದ ಪುಟಾಣಿ ಜಟ್ಟಿ

ಜಿಗಿಯುತಾ ಮೇಲೆ ದಾರಕೆ ಕಟ್ಟಿ
ಸಂಭ್ರಮಿಸಿದಳು ಕೈ ಕೈ ತಟ್ಟಿ
ಕಷ್ಟವನು ಸೋಲಿಸಿದಳು ಮೆಟ್ಟಿ
ಬುಟ್ಟಿಯಿಂದ ಬೆಳಗಿಸಿದಳು ಹಟ್ಟಿ

ಭುವನೇಶ್ವರಿ.ರು.ಅಂಗಡಿ
(ಶಿಕ್ಷಕಿ) ಸ. ಹಿ. ಪ್ರಾ. ಶಾಲೆ ಸಂಕಧಾಳ
ನರಗುಂದ, ಗದಗ

ಪ್ರಕಟಣೆಗಾಗಿ ಸಂಪರ್ಕಿಸಿ: