ಗಂಗಾವತಿ ಪ್ರಾಣೇಶ್ ಅವರ ಹಾಸ್ಯ ಚಟಾಕಿಗಳನ್ನು ಕೇಳದವರಿಲ್ಲ. ಅವರು ಕನ್ನಡದ ಮನೆ-ಮನಗಳಲ್ಲಿ ಆಧುನಿಕ ಹಾಸ್ಯ ಚಕ್ರವರ್ತಿ ಎಂದೇ ಹೆಸರುವಾಸಿ. ಅವರದು ಸಹಜ ಹಾಸ್ಯ, ಶುದ್ಧ ಹಾಸ್ಯ. ನಗಿಸುವುದೊಂದೇ ಅವರ ಧೈಯವಲ್ಲ. ನಗುವಿನ ಮೂಲಕ ಬದುಕಿನಲ್ಲಿ ಪಾಲಿಸಬೇಕಾದ ಆಚಾರ-ವಿಚಾರಗಳನ್ನು ಹೇಳಿ ಅರಿವು ಮೂಡಿಸುವುದು ಅವರ ಕಾಳಜಿ. ಪ್ರಾಣೇಶ್ ಅವರದ್ದು ಎರವಲು ಹಾಸ್ಯವಲ್ಲ. ನಮ್ಮ ನಡುವಿನ ಸಹಜ ಘಟನೆ, ಪ್ರಸಂಗಗಳಲ್ಲಿ ಅವರು ಹಾಸ್ಯವನ್ನು ಕಾಣುತ್ತಾರೆ. ಅದನ್ನು ಅಷ್ಟೇ ಸಹಜವಾಗಿ ಪ್ರಸ್ತುತಪಡಿಸುತ್ತಾರೆ. ನಗಿಸುವವನಿಗೆ ಆಂಗಿಕ ಭಾಷೆಯಷ್ಟೇ, ನುಡಿಗಟ್ಟು, ಸಹಜತೆ, ಪ್ರಾದೇಶಿಕತೆ ಹಾಗೂ ಟೈಮಿಂಗ್ ಬಹಳ ಮುಖ್ಯ. ಪ್ರಾಣೇಶ್ ಈ ಎಲ್ಲ ಸಂಗತಿಗಳನ್ನೂ ಸಲೀಸಾಗಿ ಮೈಗೂಡಿಸಿಕೊಂಡಿದ್ದಾರೆ. ಎಂಥ ಪ್ರಸಂಗಕ್ಕೂ ಖಾಸಗಿತನ ಹಾಗೂ ವೈಯಕ್ತಿಕ ಸ್ಪರ್ಶವನ್ನು ಕೊಟ್ಟು ಆಪ್ತವಾಗಿಸುತ್ತಾರೆ.

ಇಂಥ standup comedian ಅಂಕಣ ಬರೆದರೆ ಹೇಗಿರುತ್ತದೆ? ಮಾತುಗಾರ ಪ್ರಾಣೇಶ್ ಹಾಗೂ ಬರಹಗಾರ ಪ್ರಾಣೇಶ್ ನಡುವೆ ನವಿರಾದ ಪೈಪೋಟಿ ಏರ್ಪಡುತ್ತದ್ದೆ. ಇದರಲ್ಲಿ ಯಾರು ಗೆಲ್ತಾರೆ ಅನ್ನೋದನ್ನು ಹೇಳೋದು ಕಷ್ಟ ಕಾರಣ ಇಬ್ಬರ ನಡುವೆಯೂ ಸಮಬಲದ ಹೋರಾಟ ನಡೆದಿದೆ. ಬರಹಗಾರರಾಗಿ ತಾವೇನೂ ಕಮ್ಮಿಯಿಲ್ಲ ಎಂಬುದನ್ನು ಪ್ರಾಣೇಶ್ ತೋರಿಸಿಕೊಟ್ಟಿದ್ದಾರೆ. ಮಾತುಗಾರ ಪ್ರಾಣೇಶ್ ಅವರನ್ನಷ್ಟೇ ಬಲ್ಲವರಿಗೆ ಇದು ಅವರ ಮತ್ತೊಂದು ವ್ಯಕ್ತಿತ್ವವನ್ನು ತೆರೆದಿಟ್ಟಂತಾಗಿದೆ. ನೀವು ಬರಹಗಾರ ಪ್ರಾಣೇಶ್ ಅವರನ್ನೂ ಅಷ್ಟೇ ಗಾಢವಾಗಿ ಇಷ್ಟಪಡುತ್ತೀರಿ. ಪ್ರಾಮಿಸ್!